لاحظت إن فيه ناس كتير بتسأل عن حوار الجيمنج على لينكس وقررت اعمل الثريد دا علشان اجاوب على بعض التساؤلات.
الثريد دا مستحيل يكون كامل وفيه كل المعلومات فا لو حد حابب يضيف حاجة يقدر يعمل كومينت وهعدل الثريد واضفيها.
الالعاب المدعومة على لينكس
فيه العاب كتير بتدعم Linux بدون مشاكل واكبر مثال عليهم هي Minecraft.
ماينكرافت من الالعاب الي بتشتغل على لينكس بدون اي مشاكل وحتى الاداء فيها قد يكون افضل بكتير من ويندوز. (ملاحظة بسيطة: اللعبة دي مجرد مثال بسيط لتوضيح إن لينكس ممكن تلعب عليه مش اكتر، متعتبرش مثال دقيق لإن ماينكرافت مكتوبة بلغة Java ودا من اسباب سهولة تشغيلها على لينكس ودا مختلف تمامًا عن توفير لعبة على لينكس او تشغيلها بإستخدام الـcompatibility layers)
وعلى ذكر ماينكرافت فيه مشروع لطيف اسمه Luanti، المشروع دا بيهدف لعمل محرك العاب voxel اي مربعات مثل ماينكرافت، غير كونه مشروع اوبن سورس وبيتفق مع مبادئنا كمحبين للبرامج الحرة مفتوحة المصدر ولكنه ايضًا بيسهل عليك انك تعمل مودات بإستخدام لغة البرمجة Lua، لغا لوا من اسهل لغات البرمجة الي ممكن تتعملها والـsyntax بتاعها او قواعد كتابة الكود بسيطة جدًا مثل لغة بايثون. ممكن تبص على المودات/الالعاب المعمولة على Luanti في الموقع دا content.luanti.org.
فيه العاب اكتر مدعومة على لينكس وحتى Steam بيدعم لينكس وفيه العاب كتير هناك مدعومة على لينكس رسميًا وبتشتغل بدون اي مشاكل
ممكن تشوف الموقع protondb.com علشان تعرف ايه المدعوم من العاب ستيم على لينكس.
واحد من المواقع المهمة ليك كجيمر على لينكس هو موقع GamingOnLinux الي تقدر تشوف فيه اخبار عن الالعاب، عرض الالعاب المدعومة على لينكس، والعديد من الامور التانية الي ممكن تهم اي جيمر بيلعب على لينكس.
الالعاب الغير مدعومة على لينكس
دلوقتي فيه كتير من الالعاب الي مش بتدعم لينكس رسميًا بس ممكن تشغلها بحاجة اسمها wine او proton. نبدأ بـwine.
عكس ما بعض الناس بتعتقد Wine مش محاكي (wine stands for: wine is not an emulator) إنما هو compatibility layer الهدف منه ترجمة الـAPI calls الخاصة بويندوز للشبيه الخاص بيها على لينكس، بالمختصر الشديد بيسمحلك تشغل العاب وبرامج ويندوز على لينكس، Wine حلاوته انه مش مخصص للألعاب بس إنما البرامج برضو، طبعًا ميقدرش يشغل كل حاجة ومتقدرش تتوقع إن كل حاجة تشتغل عليه بدون مشاكل لكنه بيسمحلك تشغل العديد والعديد من البرامج والالعاب من غير مشاكل.
فيه عندك Proton دا الخاص بـSteam، بروتون هو نسخة مُعدلة من قبل شركة Valve والهدف منه تشغيل الالعاب بالتحديد، حلاوة Proton انه بيسهل الموضوع بشكل كبير دا غير إن client steam بيسمحلك تضيف العاب من عندك وتشغلها بإستخدامه فا هو يعتبر اسهل طريقة للعب على لينكس (فيه شرح تحت لطريقة إستخدامه).
كل دا كلام جميل ولكن برضو فيه العاب مش هتقدر تشغلها بإستخدام Wine او Proton، من الالعاب دي هي الالعاب الي بتستخدم شيء اسمه Kernel-level anticheat، الـKernel او النواة هي احد اجزاء نظام التشغيل الخاص بيك (معلومة: لينكس هو مجرد نواة وليس نظام التشغيل بالكامل)، النواة وظيفتها هي الربط بين الـhardware والـsoftware، إدارة البرامج والذاكرة بتاعت الجهاز.
دا بيجيبنا للمشكلة بتاعتنا، بسبب دا الـKernel-level anticheat ميقدروش يشتغلو على لينكس بكل بساطة، ليه؟ فيه نسخ كتير من النواة بتاعت لينكس دا غير الخطر الآمني الي ممكن يسببوه غير انها حاجة بتهدد خصوصيتك بشكل كبير، حاجة زي Wine او Proton ميقدروش يوفرو بيئة مماثلة لبيئة ويندوز علشان يشتغلو على لينكس.
امثلة بسيطة على العاب مش بتشتغل على لينكس بسبب الموضوع دا:
league of legends
valorant
gta v online
fortnite
destiny 2
rainbow six siege
المضحك والمحزن في الموضوع إن فيه العاب من القائمة دي يقدرو يدعمو لينكس ولكن الشركات بإختصار مش مفعلين الدعم زي fortnite، الـanticheat بتاعها بيدعم لينكس ولكن الشركة اختارت انها تقفل الدعم عن لينكس.
لو تلاحظ الالعاب الي ذكرتها العاب multiplayer وهي على الاغلب اكترية الالعاب الي بيبقا فيها مشاكل في التوافق مع لينكس بس برضو فيه العاب كتير بتدعم Linux بدون اي مشاكل.
ملاحظة: لعبة roblox من احد الالعاب الغير مدعومة على لينكس حاليًا ولكن فيه برنامج اسمه Sober بيسمحلك تشغل نسخة الهاتف وتلعب بدون مشاكل (ملاحظ على الملاحظة: دا مش محاكي)
توزيعات لينكس
على الاغلب التوزيعة الي هتختارها علشان تلعب مش هتفرق كتير ولكن فيه توزيعات بتبقا مخصصة للجيمنج زي Nobara المبنية على Fedora، كل الي بتقدمه التوزيعات دي هي انها تحملك حاجات هتحتاجها علشان الجيمنج زي Steam مثلا.
دا مش معناه انك هتواجه تجربة اسوء لو استخدمت توزيعة عادية.
بعض التوزيعات الي بننصح بيهأ:
Mint
Ubuntu
Fedora
Nobara
مشغلات الالعاب
فيه كتير من الـclients او المشغلات المدعومة على لينكس ومن الي ذكرتهم هم Steam ولكن فيه غيره كتير.
Lutris
دا من احسن الخيارات الي ممكن تستخدمها علشان اللعب بسبب إنه موجود علشان يدير اغلب الالعاب بتاعتك، بيدعم اكتر من منصة زي GOG وEpic Games وغيره، بيستخدم Wine ولكن من قريب ضافو دعم لـUMU ودا نسخة معدلة من Proton الهدف منها إستخدام Proton برا ستيم.
Heroic launcher
مشغل خاص بـEpic games وGOG.
Itch.io
المشغل الخاص بموقع Itch.io بيدعم لينكس رسميًا وممكن تستخدمه.
Game Jolt
المشغل الخاص بموقع Game Jolt بيدعم لينكس رسميًا وممكن تستخدمه.
Bottles
واحد من افضل البرامج لإدارة الالعاب وبرضو البرامج الخاصة بويندوز، بيبسط إستخدام Wine والواجهة بتاعته بسيطة ومش معقدة.
retroArch
وبمناسبة ذكر المحاكاه سابقًا، حابب اتكلم عن واحد من اعظم المشاريع في عالم محاكاة الالعاب وهو retroArch، ريتروآرش (بدون خلطه بتوزيعة Arch) هو frontend لمحاكيات الالعاب وبيدعم العديد والعديد من المحاكيات لجميع انواع الاجهزة الي ممكن تتخيلها، مثل الـNES، SNES، PC98، GameCube وكمية اجهزة اكتر بكتير. من مميزاته برضو انك تقدر تشغله على كمية اجهزة/انظمة تشغيل رهيبة، تقدر تتفقد القائمة هنا retroArch platforms. ريتروآرش من اكتر البرامج الي هتحبها لو ليك في المحاكاه او لعب الالعاب القديمة.
القرصنة
واحدة من الاسئلة الشائعة هل قرصنة الالعاب ممكنة على لينكس؟ نعم القرصنة ممكنة على لينكس والعملية مش اصعب من ويندوز بكتير، لو انت مقرصن ومتعود على الموضوع مش هيكون صعب عليك بتاتًا.
كيفية اللعب على لينكس
إستخدام Steam
لو حابب تستخدم ستيم وعندك لعبة عليه على الاغلب هتكون مدعومة ولو مش مدعومة:
ادخل Preferences -> Steam Play
بعديها فعل الخيارين دول
Enable Steam Play for supported titles
Enable Steam Play for all other titles
لو حابب تضيف لعبة انت منزلها ومش موجودة على ستيم او مقرصنها:
+Add a steam game -> Add a Non-Steam Game -> Browse -> اختار ملف التشغيل الخاص باللعبة
بعدها دوس كلك يمين على اللعبة واختار Properties
اتأكد إن الـTarget فيه مسار ملف التشغيل الخاص باللعبة والـStart in المسار الخاص بالفولدر الي فيه ملف تشغيل اللعبة.
إستخدام Lutris
دوس على علامة الـ+ الي فوق شمال
هيظهرلك كذا اختيار اهم اختيارين هم "Search the Lutris website for installers" و "Add locally installed game".
الاختيار الاول بيسمحلك تتصفح الموقع الخاص بـLutris وتشوف لو فيه سكربت بينزلك اللعبة بسهولة في حالة انها مش مدفوعة، لو مدفوعة على الاغلب احسن تاني اختيار ليك هيكون GOG.
الاختيار التاني بيسمحلك تضيف لعبة متنزلة على جهازك والخطوات كالتالي:
ِAdd locally installed game -> حط اسم اللعبة -> Runner: Wine -> Game Options
عند الـExecutable اختار ملف التشغيل الخاص باللعبة
دا يعتبر ملخص بسيط للجيمنج على لينكس، اتمنى انه يفيدكم.
اشكر u/0xAlif على إقتراح ذكر مشروع Lunanti ومشروع retroArch
